Rogstaekers Boonte Aovendje en Femiêlie Middige 2025

In 2025 bestaon de Rogstaekers 9×11 jaor mét as motto “Bekans ieëwig joonk”, mér det beteîkentj neet det vae neet oeëpe staon vör verângeringe. De nowwe reeks Boonte Aovendje en Femiêlie Middige zeen dao ’n schoeën vuuërbieëldj van.
Ónger ‘t motto “Neet te filme” prizzentieërtj Stadsvastelaovendjvereîniging de Rogstaekers heur 83e Boonte Aovendj en Femiêlie Middige. Dit jaor hieët de vereîniging gekoeëze vör ’ne ângere opzét, woeëdoeër ’t muuëgelik és um mieër minse en groepe mej te kunne laote doon aan de vuuërstellinge.

Dieës vuuërstellinge zeen in ’n korter tiêdsbestek, mér ouch de aovendj zelf zuuët d’r ângers uut as dejje de léste jaore gewindj zeetj. Alle groepe di-j mej doon zulle neet alleîn doon woeë ze good in zeen, mér ze zulle ouch uut heur comfortzone gehaaldj gaon waere, zjuust wi-j de bezeukers, mét alle hilariteit di-j dao beej keumtj. Laotj uch mér ’s verrasse!
Vör dit jaor gaon in totaal mieër as 75 vreejwilligers mej doon aane aovendj:
– Boonte Aovendj Artieste
– Boonte Femiêlie Middig Artieste
– B.O.V.A.G.
– Manoeuvre
– One in Motion

En ouch oeës eige Roggebieëste, de jeugd van 12 – 16 jaor, kriêge ’n rol inne Boonte Femiêlie Middig.